1 کروڑ روپے سے زائد مالیت کے پستے کی ڈکیتی

بھارت میں ڈاکوؤں نے 1 کروڑ روپے سے زائد مالیت کا پستہ لوٹ لیا، پستہ ایک ٹرک میں بھرا ہوا تھا جسے ڈاکو چھین کر فرار ہوگئے۔

بھارتی ریاست گجرات میں ضلع کچھ کے انجار علاقے میں 1 کروڑ روپے سے زائد مالیت کے پستے کی ڈکیتی کا معاملہ سامنے آیا ہے۔

پولیس کا کہنا ہے کہ ٹرک ڈرائیور لوکش نسادھ نے رپورٹ درج کروائی کہ وہ پورٹ کے علاقے سے ٹرک میں 1 کروڑ 44 لاکھ روپے مالیت کا 25 ہزار 110 کلو گرام پستہ بھر کر ممبئی کی جانب جارہا تھا۔

اسی دوران سنسان سڑک پر ایک کار میں 4 افراد آئے اور انہوں نے ٹرک رکوایا، 2 افراد نے پستول دکھا کر ٹرک ڈرائیور کے منہ پر رومال باندھا اور کار میں بٹھا دیا۔

دیگر 2 افراد اس کے ٹرک کی چابی اور موبائل فون چھیننے کے بعد پستہ بھرا ٹرک لے کر فرار ہوگئے۔

ٹرک ڈرائیور کا کہنا ہے کہ اسے کار میں بٹھا کر گھنٹوں ادھر ادھر گھمانے کے بعد ڈاکو انجار کے نزدیک اتار کر فرار ہوگئے۔ پولیس نے معاملے کی تفتیش کا آغاز کردیا ہے۔

اپنا تبصرہ بھیجیں